Vancouver stemning

Ég hef ekki tekið mikið af myndum undanfarið. Þegar ég var að renna í gegnum iPhoto möppuna mína sá ég að ég hafði aðeins einu sinni tekið myndir í maí og aðeins einu sinni í apríl. Sem er algjör synd því þetta er eiginlega einn fallegasti tíminn - vorið. Ég var aðeins duglegri í mars og kannski er ástæðan sú að í mars fór gróðurinn af stað í alvöru, þá fórum við líka að fá fallega daga af og til, o.s.frv. Alla vega tók ég töluvert af myndum þá.

Ég set inn örfáar hér, til að sýna ykkur aðeins stemninguna hér, en einhvern daginn ætti ég að setja saman svolitla sýningu með myndum frá Vancouver - svona til að sýna ykkur þarna heima að það er vel þess virði að skella sér á vestur ströndina. 

Fyrsta myndin er tekin af lítilli bryggju á Lacarno ströndinni sem er um tíu mínútna gang frá heimili mínu. Ég bý uppi á hæðinni og þarf bara að labba þvergötuna mína niður að ströndinni. Þarna sést vel yfir í miðbæinn en það tekur mig um hálftíma að fara þangað með strætó. Mér fannst svo skemmtilegt að sjá mávinn sitja þarna á skiltinu.

 

Mynd númer tvö er líka af mávi. Bæði er að mér þykir gaman að taka myndir af fuglunum, en mér finnst líka mávarnir einhvern veginn svo mikið einkenni á Vancouver. Kannski er það vegna þess að ég sá ekki mikið af mávum þegar ég bjó í Winnipeg (þótt þeir hefðu vissulega verið þar) en þegar ég flutti vetstureftir heyrði maður gargið í þeim næstum því hvar sem var. Myndin er tekinn inn í sólsetrið í vestri og nesið sem skagar þarna út vinstra megin á myndinni er háskólasvæðið.

 

 

Þriðja myndin er tekin niður í False Creek, rétt við Ganville Island þar sem er stærsti markaður borgarinnar. Þar má fá ávexti, grænmeti, kjötmeti, fisk, blóm, o.s.frv. Kirsuberjatréð til vinstri er eitt af einkennum borgarinnar í mars því þau eru út um alla borg. Stundum bleik, stundum hvítleit, en alltaf falleg. Einnig má sjá glitta í Burrard brúna og þar á bakvið glerháhýsi miðbæjarins. Þetta eru almennt íbúðablokkir en ekki svo mikið skrifstofubyggingar eins og háhýsi flestra annarra borga. Einnig má sjá glitta í möstur seglbátanna sem á góðum vinddegi fylla sundið.

 

Síðasta myndin sýnir návígi við kirsuberjatré. Mér þykir þau svo falleg. 

Athugasemdir

[Auður H Ingólfsdóttir (IP-tala skráð) 21.5.2007 kl. 10:41]

Takk fyrir þessar fallegu  myndir. Bjó í Seattle í þrjú ár og á vorin voru einmitt þessi fallegu kirsjuberjatré um allt á háskólalóðinni. Vekur upp ljúfar  minningar

[Doddi - Þorsteinn G. Jónsson (IP-tala skráð) 21.5.2007 kl. 14:29]

Þetta eru æðislegar myndir, Kristín. Tek undir með Auði, að þessi kirsuberjatré eru yndisleg, en ætli sólsetursmyndin með mávinum sé ekki í uppáhaldi hjá mér af þessum fjórum