Gestir á sjöundu

Það er fjölmennt á sjöundu götu í nótt. Axel og María, frændfólk mitt frá Íslandi er í heimsókn og gista hér hjá mér. Ég er svo góð frænka að ég sendi þau inn í herbergi og sef sjálf á sófanum í stofunni.

Dagurinn var fínn. Ég vann vel í morgun þegar þau voru að keyra upp frá Seattle, þar sem þau eru í heimsókn hjá frænku Maríu. Við hittumst síðan í Metrotown molanum og skelltum okkur í verslun. Það var nú ekki margt keyrt. Þaðan keyrðum við yfir til Vancouver (Metrotown er í Burnaby) og stoppuðum á leiðinni í fótboltaverslun þar sem ég fékk nýja takkaskó. Axel, þessi elska, tilkynnti þegar ég reyndi að borga skóna, að þetta væri afmælisgjöfin þeirra til mín og þar með var kortinu skilað til mín aftur og ég fékk ekki að borga. Þau buðu mér svo út að borða á eftir og við fengum frábæran mat á Earls. Maríu fannst reyndar karrí rétturinn sem hún fékk of sterkur en Axel var himinlifandi yfir borgaranum sínum.

En nú þarf ég að fara að sofa því í stofunni er ég enn nær vinnumönnunum sem munu vekja mig í fyrramálið með hamarshöggum. 

Athugasemdir

[Berglind Steinsdóttir, 18.9.2007 kl. 08:09]

Stína, er molinn þýðing á moll? Þá finnst mér það virka, Kringlan er moli og Smáralind nýrri moli. Eða hvað?

[Jenný Anna Baldursdóttir, 18.9.2007 kl. 17:23]

Til hamingju með takkaskóna.  Minni fjárhagsáhyggjur fyrir bragðið. 

[Kristín M. Jóhannsdóttir, 19.9.2007 kl. 00:13]

Berglind, já, moli erm mín eigin þýðing á 'mall'. Verslunarmiðstöð er of þungt og leiðinlegt. Fyrst kallaði ég þetta allt bara kringlur og svo ákvað ég að moli væri betra.

Takk Jenný. 

[Doddi - Þorsteinn G. Jónsson (IP-tala skráð) 20.9.2007 kl. 01:34]

Svona vilja málin oft leysast! Til hamingju með skóna og hafðu það gott. Bestu kveðjur frá Akureyri.