Undirbúningur undir veturinn

Undanfarin ár hefur októbermánuður verið óskaplega fallegur í Vancouver og vetrarveðrið, þ.e. rigningin, ekki hafist að alvöru fyrr en í nóvember. Í ár erum við ekki svo heppin. Eftir tiltölulega leiðinlegt sumar fengum við nokkuð stutt haust og októbermánuður hefur verið ógurlega blautur. Undanfarnar tvær vikur hefur t.d. næstum því rignt upp á hvern einasta dag. Og gallinn er að þetta er komið til að vera. Við megum eiga von á rigningu meira og minn þar til í apríl eða svo. Í fyrra rigndi næstum því samfellt í tvö mánuði. Við fengum einn rigningarlausan dag inn í miðju, eða svo.

Ég hef yfirleitt ekki gert margt til að undirbúa mig undir rigninguna, nema ég er alltaf með regnhlíf í töskunni og þegar regnið verður sem verst fer ég í regnkápu og regnbuxur. Skórnir eru yfirleitt bara strigaskór, nema þegar pollarnir verða of miklir, þá hef ég farið í gömlu kuldaskóna mína frá Manitoba sem hafa þykkan plastsóla sem nær uppá skóna. En þeir eru of heitir fyrir venjulegt Vancouverveður. Enda gerðir fyrir 40 stiga kulda í Manitoba.

Eftir þennan blauta októbermánuð fór ég því loks út í dag og fann mér gúmmístígvél. Ég mátaði reyndar ein tískustígvél í gær en þau voru of stór og ég vil ekki þurfa að vera í tvennum pörum af ullarsokkum. Svo ég fór í sérverslun með rigningarvörur og fann þar tvenn pör af stígvélum númer fimm (sirka 35 og hálft). Önnur voru hvít með loðkraga og ég vildi þau ekki. Hin voru blá með hundum og köttum (sbr. It's raining cats and dogs 'það rignir hundum og köttum'). Ég labbaði um í þeim í svolítinn tíma til að venjast því að vera í bláum gúmmístígvélum með teiknimyndum á, og ákvað að ef ég færi meir út í rigninguna ef ég ætti góð stígvél, þá væri það þess vel virði. Þau kostuðu reyndar um 5000 krónur en það er ekki hægt að fá mikið ódýrari stígvél en það. Þetta eru hvorki svört Nokia né blá Viking, en þau ættu að duga eins vel.

Ég held ég verði bara býsna flott í stígvélunum mínum - og regnkápan mín er blá svo ég verð öll í stíl. Kannski ég sýni ykkur mynd af mér í múnderingunni einhvern daginn. 

Athugasemdir

[Rut (IP-tala skráð) 23.10.2007 kl. 11:00]

"Kannski..." Mer finnst nu hreinlega bara skylda ad syna okkur mynd af ther i munderingunni! Mer finnast annars stigvelin thin aedisleg, thu verdur adal-paejan i Vancouver i thessu (og tha er innifalid, surrey og allar adrar nalaegar borgir, eins og vid skiljum af heimsfrettunum!). Eg veit ekki hversvegna, en thegar eg sa stigvelin thin tha datt mer i hug Winnie the Pooh...en svo fann eg bara mynd af honum i raudum stigvelum.. http://www.ezthemes.com/previews/p/poohrainrevised.jpg