Jólalög - hvað finnst ykkur?

Ég er farin að hlusta á jólalög.

Uppáhalds jólalagið mitt er alltaf O holy night (Ó helga nótt) og í gær hlóð ég niður nokkuð mörgum upptökum af því og bar saman. Sumum henti ég út strax, eins og útgáfunum með Destiny's child (gat ekki einu sinni hlustað á byrjunina), Rebu McIntyre (of mikið kántrí) og Sufjan Stevens (veit ekki einu sinni hvað það var).

Þá voru eftir þrjár útgáfur, Amy Grant, Il Divo og Josh Grobin. Il Divo útgáfuna vantar alla sál. Raddirnar eru fallegar en mér fannst svolítið eins og þarna væru vélmenni að syngja. Útgáfan með Josh Grobin er mun betri en þó finnst mér sú útgáfa ekki alveg nógu sterk. Til dæmis þegar hann syngur 'o night divine' í síðara skiptið þá fer hann ekki hátt upp. Kannski er það bara af því að ég er vön því að söngurinn fari upp þar sem ég er ekki nógu ánægð með þetta, en aðallega vegna þess að ég fæ vanalega gæsahúð á þessum stað í laginu þegar vel er gert! Góð útgáfa en ekki alveg eins góð og ég vildi hafa hana. Hrifnust er ég af útgáfu Amy Grant. Vel sungið og mikil tilfinning í  laginu.

Ég hlustaði ekki einu sinni á útgáfur N'Sync,  99 Degrees og fleiri sem mátti finna á netinu. Hafði einhvern tímann heyrt þær áður og ekki líkað. En það eru ábyggilega til fjölmargar aðrar útgáfur. Hvað finnst ykkur besta útgáfan af þessu lagi?

Annars hef ég aldrei heyrt þetta lag eins vel sungið eins og þegar Óskar Pétursson söng það með Karlakór Akureyrar fyrir nokkrum árum. 

Það er annars skrítið hvað hefur áhrif á okkur. Mér finnst t.d. að það eigi alltaf að enda jólasöng á Heims um ból, það lag má aldrei koma fyrr í dagskránni (þoli ekki þegar það er sett inn í miðja geisladiska). í Norður Ameríka er oft endað á White Christmas, sem er ágætist lag (sérstaklega með Bing Crosby) en mér finnst það algjört nónó að setja það á eftir Heims um ból.

Ég er hrifin af lögum eins og Away in a manger og It came upon a midnight clear sem bæði eru undurfalleg en virðast ekki hafa náð vinsældum á Íslandi (eða er það rangt hjá mér?). Og ég mun alltaf elska Last Christmas, kannski af því að ég var á réttum aldri þegar Wham var upp á sitt besta. 

Af íslenskum jólalögum fer mest fyrir laginu Þú komst með jólin til mín með þeim Björgvini Halldórssyni og Rut Reginalds. Ég hef ekki hugmynd af hverju. Kannski af því að ég er svo sammála textanum. Jólin eru bara svo miklu betri þegar maður deildir þeim með fólki sem maður elskar. Og þá sérstaklega þegar maður er ástfanginn. Ég er líka undarlega hrifin af laginu Þú og ég með Höllu Margréti og Eiríki Haukssyni. Nú er ég að hlusta á Guðs kristni í heimi með frænda mínum heitnum Vilhjálmi Vilhjálmssyni. Villi var án efa með eina fallegustu rödd allra íslenskra tónlistarmanna. Platan hans og Ellýjar er líka alltaf skemmtileg.

Annars er eitt fallegasta jólalag sem ég hef heyrt finnska lagið Sylvia's Christmas song (Sylvian joululaulu). Við sungum þetta í Skandinavíukórnum í Winnipeg fyrir nokkrum árum. Þetta var uppáhaldslag Yrju, gamallar finnskrar konu sem söng með okkur. Í hvert sinn sem við sungum lagið á æfingu sagði Yrja alltaf: It's so beautiful. Annað eða þriðja árið sem ég söng með kórnum veiktist Yrja af krabbameini. Allur kórinn heimsótti hana á sjúkrahúsið þegar hún lá banaleguna. Við sungum m.a. þetta lag og allur hópurinn grét. Ég veit ekki hvernig við komumst í gegnum lagið - sjálf kom ég varla upp hljóði fyrir ekka. Það var í síðasta sinn sem við sáum hana. Hún dó nokkrum dögum síðar. Fyrir nokkrum árum spurði ég finnska konu um þetta lag og hún sagði mér að þetta væri líklega vinsælasta finnska jólalagið. Kannski er lagið mér svo kært því þarna er verið að hugsa til jóla bernskuáranna, jólanna í heimalandinu þegar maður sjálfur býr annars staðar. Ég set inn enska textann og svo Youtube útgáfur með Elli Vallinoja (sem þó er aðeins af hröð fyrir minn smekk) og Antony Parviainen (sem er svolítið þungarokksleg en að sumu leyti flottari).

 

Sylvia´s Christmas song

Now Christmas did come to the north country here;
Christmas came to the snow covered strand.
Now candles are burning and shedding good cheer
Across all the broad, far flung land.
But hanging on high from the cross beam above,
A bird cage now holds captive my pretty dove,
Which, pining away, makes no sound, high or low;
Oh, who will take heed of the prisoner´s woe?

Oh, star, glowing bright, may your light shine on high,
O´er the northland´s remote wintry scene.
And then, when your radiance fades in the sky,
Your mem´ry will linger in dreams.
So dear none can I ever anywhere find
As my native country, the land of my kind!
And thanks do I offer with Sylvia´s song,
Resounding forever so splendid and strong.

(Transl. by Paul Sjöblom, © WSOY)

 

 

 

Athugasemdir

[Ár & síð, 8.12.2007 kl. 23:05]

Sæl Kristín.

Hér ertu auðvitað með langbestu útgáfuna af þessu lagi!

Kveðja, Matthías

[Egill (IP-tala skráð) 8.12.2007 kl. 23:11]

Skemmtilegur pistill hjá þér og góð jólalög sem þú velur.

Er einmitt mikill jólakall og jólalögin órjúfanlegur hluti þess að vera slíkur.

Á mér nokkur uppáhalds en svo á ég mér allra uppáhalds sem ég hlusta einungis á einusinni á ári:

All alone on christmas - Darlene Love

Carol of the bells - Kór undir stjórn Roberts Shaw

Í dag er glatt í döprum hjörtum - Karlakór fóstbræðra

In dulci jubilo í- Vienna boys choir

Kveðja

Egill

[Ingunn (IP-tala skráð) 9.12.2007 kl. 02:07]

Ég er alveg sammála þér með val á uppáhalds jólalagi! O Holy Night er langfallegasta lagið - held að flottasta útgáfan sem ég hef heyrt hafi verið í jólamessu hjá Ömmu Önnu fyrir nokkrum árum þar sem kirkjukórinn fékk einhvern ungan mann til að syngja einsöng :) Önnur lög sem eru efst á lista hjá mér: Þú komst með jólin til mín og All Alone on Christmas - klikkar ekki :)

kv. Ingunn frænka

[Rut (IP-tala skráð) 9.12.2007 kl. 08:35]

Eg dett alltaf minnst 20 ar aftur i timann thegar eg heyri kokakola jolalagid, thad eru ekki jol an thessa lags...thanks god for internet segi eg nu bara thvi her a italiu er audvitad ekki verid ad spila svona nostalgiuauglysingar i sjonvarpinu fyrir jolin! Eg hef alltaf verid mikid fyrir ad hlusta a jolalog fyrir jol...serstaklega eftir 15. des. En einhvernveginn hefur ordid litid um jolalagahlustun sidan eg kom til Italiu. Tha tok eg nefnilega joladiskana mina med mer i vinnuna og aetladi aldeilis ad koma folkinu i stemmningu, en tha voru godu fallegu islensku jolapopplogin (eins og t.d. eg og thu) bara daglegdags italskir slagarar. Eg og Thu er t.d. sigurlag San Remo hatidarinnar fra 1984, heitir Ci sarà, med thaverandi hjonunum Albano og Romina Power (http://www.youtube.com/watch?v=_Cw0JZuP7AU). Eg var semsagt skotin a kaf med jolalogin og hef ekki nad mer almennilega a strik aftur. Nuna thegar eg er heima med Oscar hef eg hisnvegar hugsad mer ad endurlifga jolalagahlustunina.

[Doddi - Þorsteinn G. Jónsson (IP-tala skráð) 9.12.2007 kl. 17:10]

Sálfur er ég hvað mest heillaður af laginu "A Spaceman came travelling" og þá í flutningi Gregorian (karlakór alveg meiriháttar), og svo finnast mér Frostrósir syngja þetta lag á íslensku yndislega vel.

Hér er hlekkur með myndbandi Páls Óskars við þetta lag - æðislega flott hjá honum finnst mér: http://www.youtube.com/watch?v=qX4pp8ifXjU 

Á heimasíðu Frostrósa má svo sjá á forsíðunni myndband af flutningi þeirra á "Geimferðalanginum" ... mér fannst það flottast hjá þeim í Glerárkirkjunni um daginn http://www.frostrosir.is/ 

Varðandi Sufjan Stevens, þá finnst mér það snilldarjóladiskur og ég fíla þessa útgáfu af O Holy Night, en ég er sammála þér með Amy Grant og Josh Groban - þó svo að ég myndi sennilega hafa Josh ofar en Amy ... að míkróleyti

[Doddi - Þorsteinn G. Jónsson (IP-tala skráð) 9.12.2007 kl. 17:11]

"Sjálfur" átti þetta auðvitað að vera hjá mér ...

[Helga Fanney (IP-tala skráð) 9.12.2007 kl. 19:43]

Jólakötturinn í flutningi Bjarkar er líklegast uppáhalds jólalagið mitt, svo er ég líka ansi veik fyrir jólaplötunni með Þremur á Palli, Gilsbakkaþula og allt það.. :)

[Kristín M. Jóhannsdóttir, 10.12.2007 kl. 06:10]

Takk Matti. Já, þetta er frábært útgáfa. Takk líka Egill, ég mun tékka á þessum lögum. Ingunn, við frænkur höfum greinilega svipaðan smekk á jólalögum. Skilaðu kveðju til fjölskyldunnar. Hehe Rut, ég man þegar þu sagðir mér frá þessu með ítölsku lögin. Þetta virkar líka í hina áttina. Mér finnst til dæmis Oh Tannenbaum ekkert jólalag af því að við sungum það við annað tækifæri. Doddi, mun tékka á þessu. Helga, já, útgáfa Bjarkar á jólakettinum er æðisleg og jólaplatan með Þremum á palli klikkar ekki. Hún er einmitt í spilaranum hjá mér núna. Það er engin íslensk jólaplata sem ég spila jafnmikið.