Ofurskálaleikurinn - Sigur Risanna

Leikurinn var ekkert smáspennandi. Ég horfði reyndar ekki á hann allan en sat límd síðustu mínúturnar. Ja, eiginlegt stóð ég límd því ég var komin í úlpu og búin að setja á mig húfu því ég þurfti að fara út að sækja Sezhuan grænar baunir sem ég hafði pantað á kínahúsinu hér í hverfinu (rosalega góður réttur).

New England skoraði touchdown þegar sirka fjórar mínútur voru eftir af leiktímanum og staðan var 14-10. Það var því ekki nóg fyrir New York að skora field goal - þeir hefðu komist hæst í 13 stig. Þannig að þeir urðu að skora touchdown. Þeir áttu eftir sín þrjú hlé og tóku þau eftir hverja tilraun til að stoppa klukkuna. Smám saman færðust þeir upp völlinn og með ótrúlegu kasti frá quarterback Eli Manning og ótrúlegu blöffi hjá hlauparanum David Tyree náðu þeir að skora touchdown þegar innan við þrjátíu sekúndur voru eftir af leiktímanum.

New England Patriots höfðu því aðeins hálfa mínútu til þess að skora en hinn frábæri quarterback Tom Brady náði ekki að koma boltanum til hlaupara sinna og leikurinn endaði 17-14.

Ég efast um að margir hafi reiknað með þessum úrslitum — Patriots höfðu ekki tapað einum einasta leik í allan vetur og virtust með ósigrandi lið. Giants aftur á móti algjör undirhundur (underdog) og spiluðu ekki einn einasta heimaleik í úrslitakeppninni. Gaman þegar svona gerist.

„Superbowl“ og „Super Tuesday“

Athugasemdir

[Gísli Ásgeirsson, 4.2.2008 kl. 07:34]

Sæl, Stína.

Maður fær næstum áhuga á ruðningi við þennan lestur. Þarna áttust við Risar og Föðurlandsvinir. Mér finnst alltaf gaman að þýða liðaheiti.

Field goal er vallarmark og kvartbakurinn er leikstjórnandinn. Undirhundur er hins vegar svo frábær þýðing að ég glotti við fót.

[Hrabba (IP-tala skráð) 4.2.2008 kl. 17:06]

oh vissi að ég hefði átt að vaka yfir leiknum - ótrúlegt en satt en þá var hann sýndur á Sýn!!

[Mummi Guð, 4.2.2008 kl. 21:23]

Ég vakti yfir leiknum og sá ekki eftir því, ...fyrr en ég þurfti að mæta í vinnu í morgun!

[Kristín M. Jóhannsdóttir, 4.2.2008 kl. 22:04]

Takk Gísli. Og já, ég held að við ættum að fara að tala um undirhunda. Þetta er gott orð.

Hrabba og Mummi, ég þurfti ekki að vaka. Svona er maður heppinn stundum. Sama á við um óskarinn. Ég sé hann á mannlegum tíma. 

[Kolbrún Kolbeinsdóttir, 6.2.2008 kl. 02:34]

Leikurinn var flottur - ég er ekki mikil fótbolta manneskja og finnst ennþá frekar erfitt að átta mig á öllum leikreglunum, en það var bara geggjað gaman að superbowl þetta árið!   Minn maður Boss (risi númer 89) stóð sig verulega vel sem spillti ekki fyrir.  

Já og undirhundar - þetta er nýyrði ársins held ég bara!