Fyrrverandi nemendur

Vorið 1994 var mér boðið að koma til Akureyrar og kenna íslensku við MA í einn vetur í fjarveru míns gamla kennara Erlings Sigurðarsonar sem hafði tekið sér frí til þess að skrifa leikrit um Davíð Stefánsson. Ég var þú búin með alla kúrsa í mastersnáminu og var rétt byrjuð að skrifa mastersritgerðina. Þetta var of gott boð til þess að taka því ekki svo ég setti ritgerðarskrif á hilluna í eitt ár og fór norður og kenndi íslensku og tjáningu þennan vetur.

Ég kenndi aðallega fyrsta og öðrum bekk svo nemendur mínir voru þetta sextán og sautján ára. Í dag (14. febrúar) á einn nemenda minna úr þáverandi 1B þrítugsafmæli. Ég trúi því ekki að þessir sextán ára krakkar sem ég kenndi þennan vetur séu nú á þrítugasta aldursári og annars-bekkingarnir mínir urðu allir þrítugir í fyrra. Ef manni finnst maður ekki gamall við svona fréttir þá veit ég ekki hvað.

Vil þó taka það fram að ég var ekki mikið eldri en nemendur mínir (24 ára) og man ég sérstaklega eftir því þegar ég fór með 2X niður í Brynju að kaupa ís. Það var venja að umsjónarkennari færi með bekkinn sinn í Brynju einu sinni að vori og ég hafði þegar farið með 1B. En umsjónarkennari 2X varð veikur um páskana og hætti svo krakkarnir báðu mig um að koma með sér í staðinn. 2X, sem var eðlisfræðibekkur, var samansettur af sautján ára gömlum strákum og þremur fremur hávöxnum stúlkum. Ég var langminnst og leit ekki út fyrir að vera degi eldri en þau hin. Það var venjan að kennarinn fengi ókeypis ís frá Brynju, svona í þakklætisskyni fyrir að koma með heilan hóp af viðskiptavinum inn í búðina, en þegar ég mætti á svæðið með krökkunum mínum kom fát á afgreiðslukonuna. Að lokum klappaði einn strákanna á kollinn á mér og sagði: Þetta hérna er kennarinn. Það er hún sem á að fá ókeypis ís! 

Athugasemdir

[Kolbrún Kolbeinsdóttir, 15.2.2008 kl. 02:26]

Mmmmm Brynjuís!!  Svona blogg valda nú bara nokkuð sterkri heimþrá, en það eru víst nokkrir mánuðir í að ég komist í ísinn!   

[Rakel (IP-tala skráð) 15.2.2008 kl. 04:27]

Hahahahaha fyndið, litla mín!

Oh ég fæ mér sko ísinn góða þegar ég fer heim í sumar, engin spurning!!

GÓÐA HELGI

[Helga Fanney (IP-tala skráð) 15.2.2008 kl. 14:21]

Ég man nú bara aldrei eftir að hafa farið í Brynjuís-ferð með bekknum þegar ég var í MA.. Gæti svosem verið að ég sé bara orðin svona gömul að ég muni hreinlega ekki eftir því.. ;) Veit hinsvegar mætavel hvernig þér líður, Bryndís sem ég passaði, sem au-pair í London forðum daga (hún var 4ra ára þá), er að verða 21 og að gefa út sína fyrstu geislaplötu.. Það er fyrst núna sem ég er að upplifa að fólk sem ég þekkti sem börn eftir að ég sjálf var orðin fullorðin, er sjálft orðið fullorðið og mér líður eins og steingervingi!

[Kristín M. Jóhannsdóttir, 15.2.2008 kl. 16:37]

Veistu Helga að ég held að þetta hafi ekki verið orðið vani þegar við vorum í MA. Byrjaði eftir það. Þau voru líka farin að syngja önnur lög þegar ég var þarna sem kennari. Ekki öll lögin auðvitað. Steinar í berjamó er enn sunginn, en þau sungu alls konar lög sem ég kunni ekki. Jafnvel MA breytist.

Vá, er stelpan hennar Röggu að fara að gefa út plötu? 

[Berglind Steinsdóttir, 15.2.2008 kl. 16:43]

Ég er mjög hrifin af Akureyri - en er ekki Brynjuís úr vatni ...? Hmm.

[Kristín M. Jóhannsdóttir, 15.2.2008 kl. 18:03]

Satt að segja, Berglind, er ég alveg sammála þér. Brynjuís er ekki minn ís.

[Eiríkur (IP-tala skráð) 15.2.2008 kl. 18:04]

Ég hef aldrei skilið þessa nostalgíu með Brynjuísinn. Þetta er bara vatnssull eins og Berglind segir.

[Helga Fanney (IP-tala skráð) 15.2.2008 kl. 18:27]

Jeps, plata handan við hornið hjá fyrrum skjólstæðingi mínum. Alveg ótrúlegt!

Mér finnst Brynju-ísinn bara ægilega góður :) Fer alltaf í Brynju þegar ég er heima á klakanum.

[Berglind Steinsdóttir, 16.2.2008 kl. 10:05]

Ju, ég hélt að ég væri að fremja harakírí með athugasemdinni um ísinn. Hafið þökk fyrir, Stína og Eiríkur R., að bjarga helginni hjá mér.

[Rut (IP-tala skráð) 16.2.2008 kl. 17:57]

Eg er ein af theim sem tharf alltaf ad fara einusinni eda tvisvar i brynju ad fa mer is thegar eg er heima. Ekki endilega vegna thess ad thetta er besti isinn, heldur vegna thess ad madur faer hann bara tharna, og hann er svo sjuklega ferskur og godur (stundum dreymir mig um hann a sjodbullandiheitummidjardarhafssumardegi). Einn af hapunkti jolanna hja okkur nuna (and believe it, vid thurftum a hapunktum ad halda) var thegar herra brynju-is (vinur foreldra minna) hringdi i okkur og sagdist vera a leidinni med storan skammt af is handa okkur. Vid vorum oll med skeidar a lofti og sleftauma nidur a bringu thegar hann birtist med isinn :)  En eg segi eins og Helga, eg man ekki eftir thessari brynjuisahefd a menntaskolaarunum...kannski er hun seinna til komin, eda heilinn er buid ad leggja thessari minningu i lokada geymslu!