Frábær leikur - frábær sigur

ÁÁÁÁÁÁÁÁFRAM WHITECAPS!!!!!!!! ÁFRAM TEITUR!!!!!!!!!

   

Ég var á vellinum og hvatti strákana áfram til sigurs og verðskuldaður var hann. Mér fannst reyndar Puerto Rico Islanders byrja heldur betur og þeir voru sterkari í loftinu. En um miðjan fyrri hálfleik tóku strákarnir hans Teits sig saman í andlitinu og voru sterkari aðilinn eftir það. En Puerto Rico strákarnir börðust vel og gáfu ekkert eftir.

     

Staðan var 0-0 í hálfleik en stuðið magnaðist í síðari hálfleik. Fyrsta mark leiksins kom á fimmtugustu og fimmtu mínútu þegar Gbeke, sóknarmaðurinn sterki skallaði boltanum í markið eftir hornspyrnu. Rúmum tíu mínútum síðar jafnaði Gbandi fyrir Puerto Rico, einnig með skalla. En Whitecaps voru ekki á því að fara í framlengingu og á 73 mínútu mátti sjá þá í sínu besta formi. Martin Nash, bróðir körfuboltamannsins fræga, Steve Nash, kastaði boltanum til Moose (uppáhaldsleikmannsins míns) sem sendi boltann hátt fyrir markið þar sem Gbeke stökk hæstur manna og skallaði boltann fram hjá Gaudette, markmanni Puerto Rico. Staðan 2-1 og áhorfendur á vellinum að ganga af göllunum. Puerto Rico sótti stíft eftir þetta en Whitecaps náðu að halda markinu hreinu og þegar komið var fram yfir venjulegan leiktíma byrjaði áhorfendaskarinn að söngla sigursönginn og hélt því áfram þangað til dómari flautaði leikinn af. Um leið og það gerðist var bláum og hvítum strimlum skotið upp í áhorfendastúkuna og allt ætlaði að ganga af göflunum. 

  

Russ vinur minn frá Vanoc kom með mér á leikinn og þetta var hans fyrsta reynsla af atvinnufótbolta. Þvílíkur leikur sem hann fékk að sjá. Við héngum áfram á leikvellinum því við vildum fagna með strákunum og ég vildi líka fá tækifæri til að óska Teiti til hamingju. Þar að auki tók Russ það ekki í mál að við færum fyrr en hann fengi mynd af mér með uppáhaldsleikmanni mínum, Moose, sem átti stóran þátt í báðum mörkum Vancouver. Hvort tveggja tókst og má sjá árangurinn hér á síðunni.

   

Ég vil nota tækifærið og óska Teit innilega til hamingju með sigurinn. Þetta er frábær árangur hjá honum á fyrsta ári sem þjálfari liðsins. Eins og hann sagði sjálfur - hvert skal stefna nú? Toppnum er náð. Þeir komast ekki hærra fyrr en liðið nær að kaupa sig inn í MLS deildina. Kannski er það helst að þeir geti stefn að Ameríkubikarnum næst! Til þess þurfa þeir að vinna Toronto og Montreal næsta sumar svo þeir geti keppt fyrir hönd Kanada, og síðan er bara að fara alla leið. Hey, ekkert að því að stefna hátt.

P.S. Óska Mogganum til hamingju með það að hafa fylgst með úrslitunum. Þegar ég kom heim af leiknum, eftir reyndar stopp á veitingastað til að borða kvöldmat, þá var búið að setja upp þessa frétt sem ég tengi á. Frábært. Teitur á það skilið að sagt sé frá hans góða árangri heima á Íslandi. Ekki veitur svo sem af að segja frá góðum hlutum eins og ástandið er almennt heima þessa dagana.

 

 

Teitur meistari á sinni fyrstu leiktíð

Athugasemdir

[Sigrún Jónsdóttir, 13.10.2008 kl. 09:15]

Flott "útrás" í gangi þarna

[Rut (IP-tala skráð) 13.10.2008 kl. 11:25]

vel af ser vikid hja islendingnum....thad er thorf a godum frettum af islendingum a thessum krepputimum, svo Teitur hefur stadid sig vel. Eg saknadi hinsvegar umtals a blogginu thinu um Guinnes-drykkjumanninn..!

[Kristín M. Jóhannsdóttir, 13.10.2008 kl. 20:52]

Rut, honum fannst ég skipuleggja fyrstu fótboltaferð sína vel: úrslitaleikur, sigurleikur, sólskin... Ertu að leita eftir einhverjum öðrum fréttum?

[Róslín A. Valdemarsdóttir, 13.10.2008 kl. 22:10]

Myndirnar fengu mig til að brosa - glæsilegt !