Hugleiðingar um hraðahindranir

Ég er að reyna að átta mig á því hvernig hraðahindranir eiga að virka á Íslandi. Ég hef alltaf haldið að þær væru settar til þess að koma í veg fyrir að fólk keyrði of hratt, og samkvæmt mínum skilningi er 'of hratt' sem sagt yfir hámarkshraða. En þannig virðist þetta ekki vera - alla vega ekki hér í 104. Leyfilegur hraði í Álfheimum og á Langholtsvegi er 50km á klukkustund. En hraðahindranirnar á þessum tveim götum eru þannig hannaðar að ekki má keyra hraðar en á 30 ef maður vill ekki eiga á hættu að skemma bílinn. Hvernig stendur á því að ef leyfilegur hraði er 50 að hraðahindranirnar krefjast þess að maður keyri ekki hraðar en á 30? Ætti hraðahindrunin ekki að vera í samræmi við leyfilegan hraða? Bara spyr.

Athugasemdir

[Erla Magna (IP-tala skráð) 10.10.2011 kl. 22:57]

Bílarnir okkar skemmasr mikið á þessum hindrunum- við borgum !

[Olgeir (IP-tala skráð) 11.10.2011 kl. 16:18]

Mikið eru allar þessar hraðahindranir slæmur vitnisburður um menningarástand þjóðarinnar. Þegar við fórum til Þýskalands 2002 fórum við mikið um Hamborg og til Berlínar. Ekki sá ég eina einustu hraðahindrun í þessum borgum en þar eru þær í heilanum á fólki og umferðin með meiri menningarbrag en hér á landi.

[Hrafnhildur (IP-tala skráð) 11.10.2011 kl. 22:32]

Allar þessar hraðahindranir sem þú nefnir eru settar vegna óska frá íbúum og eru í nágrenni skóla þar sem börnin labba í skólann. Æskilegt er að ná hraða niður á þessu svæði og ég held reyndar að það hafi tekist. Hérna er stefna sú að hafa 30 kílómetra hámarkshraða í hreinum íbúðagötum og oft eru búnir til 30 km bútar fram hjá skólum. Í nágrenni Langholtsskóla hefur sú leið verið valin að setja hraðahindranir og skilti sem segir þér hvað þú ekur hratt í staðin fyrir að lækka hámarkshraða á hluta Álfheima og Langholtsvegi niður í 30. Það hefði verið hinn kosturinn. Held að þessi leið að ná hraðanum niður með hraðahindrunum akkúrat þar sem ungir sem aldnir ganga yfir götuna sé ágæt leið þó að skiltaður hraði sé hærri.                                                                  Hins vegar eru fleiri leiðir til að lækka umferðarhraða en þessar bungur sem eru kallaðar hraðahindranir. Það má gera með því að mjókka götur, gera á þær sveigjur, setja gróður við götubrún, miðeyjur og svo framvegis. Við íbúar höfum lengi verið gert of mikið af því að óska eftir þessum bungum af því að við þekkjum ekki hinar leiðirnar.

Annars ætlaði ég ekkert að vera langorð. ........ með kveðju.

[Kristín M. Jóhannsdóttir, 12.10.2011 kl. 00:24]

Það að setja mjókkunina og gróðurinn og það hefur reyndar aukaáhrif sem fólk gleymir oft - það er nefnilega ekki hægt að hreinsa almennilega svona götur því sópararnir komast ekki inn í hornin og þar safnast þá saman algjör viðbjóður. Það er einmitt svoleiðis í götunni hjá mömmu og pabba og það er til skammar að sjá hvernig þetta verður. Og svo þegar er snjóþungt þá ná skafararnir ekki almennilega þarna inn og taka þá oft það ráð að safna bara snjónum saman einmitt þar og þá lenda íbúarnir í því að hafa risaskafl fyrir framan húsið sitt allan veturinn (á Akureyri - slíkt gerist ekki í Reykjavík).

Í Kanada er hraðinn við skóla aldrei meiri en 30 eða 40 yfir daginn en hækkar svo í 50 á kvöldin þegar skólinn er búinn. Það væri náttúrulega of flólkið fyrir Íslendinga en ætti þá ekki bara að hafa hraðann 30 á þessum stöðum og gera það án hraðahindrana? Hraðahindranir eru hreint út sagt ömurlegar og gera ákaflega lítið gagn því fólk bara spýtir í á milli þeirra - hef sjálf gert svoleiðis og sé það hjá bílunum hér fyrir utan daglega.

[Rut (IP-tala skráð) 12.10.2011 kl. 08:28]

Ég minni á leiðina sem oft er notuð hérna á Ítalíu, hraðatengd umferðaljós, svokölluð ROSSOSTOP! Ef þú keyrir of hratt þá kemur rautt ljós og þú neyðist til að stoppa, ef þú ert undir löghraða geturðu ekið áfram! Svona ljós hlýtur að mega forrita þannig að á kvöldin hafi þau annan hraðastuðul en á daginn! Stína, hvernig væri að senda tillögu um þetta á umferðarráð borgarinnar?