Játningar miðaldra málfræðings

Doddi klukkaði mig í gær og af því að ég get ekki skorast undan játningunum ætla ég hér að setja fram 8 sannar fullyrðingar, en ég verð samt að hryggja fólk með því að ég ætla ekki að klukka neinn áfram af því að ég þoli ekki keðjubréf og þvíumlíkt og sendi þau aldrei áfram (nema helst ef þau lofa ást innan fjögurra daga).

1. Ég er með ofnæmi fyrir fiski ("What! an Icelander allergic to fish" er algengasta setningin sem ég heyri í Kanada).

2. Ég æfði skíði í tíu ár og þótt ég hefði unnið fjöldamörg mót á þeim tíma (varð bikarmeistari þegar ég var sextán ára og Akureyrarmeistari í nokkur ár) náði ég aldrei að vinna Íslandsmeistaratitilinn. Varð alltaf stressuð og datt eða skíðaði illa á Íslandsmeistaramótum og unglingameistaramótum. 

3. Íþróttir eru áhugamál númer eitt tvö og þrjú. Fyrir utan að hafa æft skíði, fimleika, frjálsar íþróttir, og fótbolta hef ég einhvern tímann á lífsleiðinni keppt á gönguskíðum, í handbolta, golfi, víðavangshlaupum, blaki og ultimate, og mér til gamans stundað hokkí og klettaklifur.

4. Ég hef verið með fleiri Kanadamönnum en Íslendingum (vona að mamma sé ekki að lesa þessa færslu).

5. Ég hef tvisvar sinnum verið rænd (í Danmörku og á Íslandi) og einu sinni hefur verið ráðist á mig úti á götu (á Spáni).

6. Ég stunda klettaklifur og samt er ég ógurlega lofthrædd.

7. Ég bjó í fjögur ár með heimspekiprófessor og vann engar rökræður (né rifrildi) á þeim tíma - ekki einu sinni þegar ég hafði rétt fyrir mér. 

8. Ég á þrjá eldri bræður, níu bræðrabörn og yndislega foreldra. Mér finnst ég ákaflega heppin með fjölskyldu þótt ég hefði viljað gefa mikið fyrir að eiga systur. 

Athugasemdir

[Jenný Anna Baldursdóttir, 12.7.2007 kl. 17:27]

Játningar konunnar frá Kanada.  Hm.. nú hringir mamma þín og tekur á þig þriðju gráðu. Takk fyrir skemmtilega færslu.

P.s. Hví kallar þú þig miðaldra? Ég er miðaldra og hef sterklega á tilfinningunni að ég eigi meiri rétt á að kalla mig það en þú.

[Kristín M. Jóhannsdóttir, 12.7.2007 kl. 17:33]

Miðað við meðallíftíma er ég miðaldra. Það er, á miðjum aldri (37). Ég setti þetta nú reyndar bara inn af því það stuðlaði svo vel við málfræðingur og ég gat ekki sagt "játningar mjós málfræðings" án þess að ljúga. Kannski ég hefði átt að segja "játningar mæðulegs málfræðings".

[Guðríður Hrefna Haraldsdóttir, 12.7.2007 kl. 20:58]

Svona krakki eins og þú hefur heilmikla lífsreynslu miðað við listann þinn. Mér var sagt frá því ég var pínuponsukrakki að fólk yrði ekki löglega miðaldra fyrr en 50 ára! Það eru nákvæmlega 13 mánuðir í það hjá mér. Þangað til ætla ég bara að njóta þess að vera ung skutla.

[Doddi - Þorsteinn G. Jónsson (IP-tala skráð) 13.7.2007 kl. 01:01]

Elsku Kristín - ég biðst afsökunar á þessu klukki, en þakka þér samt fyrir svörin. Frábært að kynnast þér ögn nánar með svona játningum. Sjálfur er ég anti- á svona keðjudæmi, en gaf þessu séns hér. Hefði að öllum líkindum gert bara eins og þú - sagt átta atriði um mig án þess að klukka neinn, en það kom prakkari upp í mér ... og... what's done is done

Hef ekki búið með heimspekiprófessor, en ég kannast við það að eiga í erfiðleikum í rökræðum og "rifrildum" við þannig spekinga! Frá 1996 hef ég verið í JCI og stór þáttur í því lífi er ræðumennska og þjálfun í ræðumennsku. Ég hef verið leiðbeinandi í ræðumennsku síðan 1997 og það er ekki hægt að segja annað en að það hjálpi mér svolítið í rökræðum við marga aðila. Ég met það mikils. Ef næsta ást þín verður heimspekiprófessor, þá skaltu bara borga undir mig miða til Kanada og ég tek þig í crash course (er það rétt að segja?) í ræðumennsku

Bestu kveðjur frá Íslandi,
             D.

p.s.
Ég hef verið rændur í Mallorka  og á Íslandi - og einu sinni var ég barinn í miðbæ Reykjavíkur... 

[Kristín M. Jóhannsdóttir, 13.7.2007 kl. 05:22]

Auður mín. Mér finnst þú hreinlega verðir að jafna metin hvað varðar fjórða lið. Og helst að tvöfalda töluna.

[Kristín M. Jóhannsdóttir, 13.7.2007 kl. 05:58]

Ég gleymdi einu: Doddi, ekkert að afsaka. Þarna fékk ég tækifæri til þess að segja frá einhverju sem ég hefði annars ekki sagt frá.