Ekki má maður skreppa frá

Ég fór í skólann í morgun og vissi ekkert af öllum þeim rýtingum sem verið var að stinga í bök borgarstjórnarmanna heima á meðan ég var þar. Kom heim og les fréttir og skildi ekki alveg hvernig Ólafur og Vilhjálmur gátu skipt með sér borgarstjórnarstól í stjórn sem Sjálfstæðismenn voru ekki hluti af. En ég áttaði mig fljótlega á því að eitthvað mikið hafði gerst á meðan ég var í skólanum.

Mér ætti auðvitað að vera sama því ég má ekki einu sinni kjósa lengur í Reykjavík. Hef löngu misst kosningarétt í sveitastjórnarkosningum á Íslandi. En auðvitað er manni ekki sama og mér þóttu þetta ljótar fréttir. Og kannski þykir mér verst hvernig þessir stjórnmálamenn hegða sér, óháð því hver situr í stjórn og hver svíkur hvern. Björn Ingi sveik Sjálfstæðismenn fyrir ekki mörgum mánuðum, nú svíkur Ólafur flokksbrotin-sem-áður-kölluðust-R-listi (eins og the artist formerly known as Prince). Og þetta er ekki nein ný uppfinning. Ég gleymi seint 1989 þegar Jón Baldvin og Steingrímur sviku Þorstein? Ég var ánægð með stjórnina sem tók við en hef alltaf haft óbeit á því hvernig að málum var staðið. Þorsteini var fórnað á altari stjórnmálanna eftir að Jón Baldvin hafði klúðrað fjármálaráðuneytinu. Og þetta batt auðvitað endiá feril Þorsteins og auðveldaði Davíð aðkoma. Fjöldi stjórnmálamanna er tilbúinn til þess að fórna miklu fyrir eigin hagsmuni. Og þetta er liðið sem á að sjá um mál okkar hinna.

Fuss og svei, það er mannaþefur í helli mínum. 

Nýr meirihluti í Reykjavík

Athugasemdir

[Robbi Schmidt (IP-tala skráð) 22.1.2008 kl. 00:47]

Þetta er orðin algjör leiksýning og við megum ekki missa af næsta þætti. Nú beinist kastljósið að Möggu Sverris sem er í fílu. Skyldi hún láta undan gylliboðum næstu daga? Hvernig fer með Glanna Glæp (Björn Inga) og fatamálið mikla sem er algjört milljón? Verður Guðjóni Ólafi sparkaðu úr Framsókn? Kaupir Glanni Glæpur sér annað hnífasett? Er von að maður spyrji. Það er óhætt að segja að það sé ekki gúrkutíð hjá fjölmiðlum þótt gúrkutíð sé hjá gúrkubændum!

Róbert Schmidt

[Kristín M. Jóhannsdóttir, 22.1.2008 kl. 01:09]

Haha, þú ert alveg milljón Róbert.  Ég mæli með að þú skrifir bók um málið. Nei, leikrit. Heldurðu að þetta væri ekki flott á sviði. Annars má líka búa til framhaldsmyndaröð og hafa svona spurningar í lok hvers þáttar. Ég held það hafi ekki verið gert síðan á áttunda áratugnum.

Ég bíð spennt eftir að sjá hvað gerist næst. Það er varla að ég þori út úr húsi því margt gerist á stuttum tíma. 

[Einar Indriðason, 22.1.2008 kl. 08:45]

Já, svei pólitíkusum.

(annars er þetta bara stutt innlitskvitt.)

[Magnús V. Skúlason, 22.1.2008 kl. 13:25]

Mér sýnist nú stjórnmálamennirnir vera búnir að skrifa handritið að leikritinu, spurning um að fara af stað með áheyrnarprufur.

Annars skilst mér að það sé útsala á Bingo veiðihnífum á vefsíðu Amazon

[Anna Ólafsdóttir Björnsson, 22.1.2008 kl. 14:42]

Ef það er til huggunar, þá held ég að þetta hafi nú ekki gerst af því að þú skrappst frá ;-)  ... en svona fyrir utan það þá er þetta auðvitað málaflokkur sem ætti ekki að vera farsi, síst grafalvarlegur farsi.

[Þorsteinn Sverrisson, 22.1.2008 kl. 20:00]

Já hér er allt brjálað, veðurfarið, pólitíkin og hlutabréfamarkaðarnir.  Þakkaðu fyrir að þurfa ekki að kjósa

[Kolbrún Kolbeinsdóttir, 23.1.2008 kl. 01:24]

Ég segi það með þér að eitthvað lykta þessi borgarstjóra mál heldur illa.  Ég get nú ekki kosið fremur en þú og þar sem að ég er ekki bandarískur ríkisborgari get ég ekki kosið hér heldur.  Voðalega aumt eitthvað, en maður getur allavegana fylgst með farsanum!

[Hagbarður, 25.1.2008 kl. 22:51]

Alltaf skemmtilegt að lesa bloggið þitt.

[Kristín M. Jóhannsdóttir, 26.1.2008 kl. 07:25]

Takk fyrir Hagbarður. Og takk þið hin fyrir umræðuna.  Anna, ég held að þú hafir rétt fyrir þér. Magnús, góður.